上手擊球動作唔順、膊頭成日痛？問題可能唔係手臂，而係你嘅核心同動作出錯

你有冇試過——打排球、打羽毛球、投籃、甚至做 gym 嘅時候，手明明出盡力，但球飛唔遠、動作唔順，仲有啲膊頭、手肘痛？好多時候，我哋第一個反應係：「係咪我手太弱？」，或者「係咪我要加練力量？」

但事實上，問題好多時都唔喺手，而係「身體點樣帶動隻手」。

上肢發力動作，其實係全身協調嘅動作

無論投球、揮拍、擊球，都唔只靠手臂。

真正嘅力量，應該係由軀幹開始傳遞。

當你想將球拋出去時，身體會先「扭動」製造反向拉力，就好似拉弓一樣——拉得越滿，彈得越強。呢個時候，核心肌群會被拉長（離心收縮），接住再反向「彈出」，力量就沿住腹外斜肌、前鋸肌一路傳到手臂，形成鞭出去嘅感覺。

好多教練係訓練時都會話手要鬆，而作為球員，好多時後就會覺得：又要鬆，又要大力，即係點呀？

當教練話「手鬆啲，力量會更大」，其實講緊嘅就係——手唔應該係出力嘅起點，而係力量傳遞嘅終點。

投擲動作出問題，通常有三個原因

• 軀幹旋轉唔順

好多時核心太緊（腹壓太高）或者太鬆（不穩定），都會令軀幹轉動唔自然，力量傳唔到上肢，變成「用手硬撐」。

• 前鋸肌發力差

前鋸肌係上肢最重要嘅「橋樑」，負責將核心力量傳送到手臂。當佢唔夠力或控制差，就會導致肩胛骨位置偏移，令手臂出力時肩膊頂住、卡住。

• 發力順序錯誤

如果動作唔係由軀幹帶手，而係手自己搶先出力，長遠就容易出現勞損。好似排球員嘅肩峰痛、羽毛球員嘅手肘痛，其實好多都源於錯誤嘅發力順序。

想改善？可以從兩個方向入手

• 訓練軀幹旋轉能力：核心訓練唔係越硬越穩就越好。學識「控制」核心，令身體能夠自然轉動，而唔係死撐，先係真正嘅力量起點。

• 強化前鋸肌功能：訓練肩胛骨嘅活動與穩定度，讓手臂動作更順、更穩、更有爆發力。前鋸肌運作得好，整個上肢動作鏈都會變得更流暢。

理解身體，訓練先有方向

好多時候，我哋以為訓練就係重複動作。但當你真正理解身體如何運作，就會發現——訓練唔只係發力，更係一場思考與調整。

在 Performancefix，我哋會透過動作評估，幫你找出身體發力嘅「斷層」，再以針對性訓練或物理治療，協助你改善動作模式、減少痛症、提升表現。與解剖學帶入日常工作，而非把這些資訊當成過於複雜的科學。

歡迎whatsapp 查詢！