究竟運動表現教練嘅功能係咩呢？點解需要運動表現教練呢？
令到人大力啲，可以跑得快啲，跳得高啲，呢啲係好表面嘅答案，但其實運動表現教練本身嘅功能應該係點呢？
如果要將運動員嘅身體能力分成三個層次的話，可以簡單分為：
1. 身體基礎能力 (foundation)
2. 運動能力 (performance)
3. 專項技術 (sport skills)
—
身體基礎能力
第一種身體基礎能力，即是指身體有沒有基本的活動度與穩定性。舉例：
脊椎的前彎後彎側彎旋轉有沒有正常的活動幅度，
呼吸能力是否理想，
髖關節有沒有合格的髖屈、髖伸、髖內外旋幅度，
單腳有無穩定性，
肩關節能不能夠舉手過頂，
能不能夠在過頂的狀態時發力
所有運動的所有能力都是從以上這些身體基礎能力演化而來，如果在靜態的環境下已經出現活動度缺失或控制缺失的話，可以想像在高速移動的環境就只能夠依靠代償來完成。
—
運動能力
身體基礎能力往上，就係將呢啲能力加強，即係運動能力，亦都即係大家理解嘅力量、爆發力、速度專向訓練，並且係多角度咁做。
可以想像呢個層次嘅目的係幫助大家係高速移動，大衝擊力嘅環境依然可以控制身體，保持動作嘅精確性。
除左係一般理解嘅上下移動（深蹲、硬拉）之外，仲需要加入額狀面、水平面發力（水平面先係主要發力平面）嘅能力，同埋單邊訓練等等，去全方位加強身體。
仲有就係一啲移動技巧，如果加速、急停、轉向、投擲等等，都係非常技巧性嘅動作，並唔單純係大力就可以解決問題。如果掌握好呢啲技巧，係真實賽場上都會移動得比較輕鬆。
—
專項技術
最後，專項技術就應該係運動員同自己嘅專項教練係運動場上去訓練，運動表現教練頂多起到輔助作用。
可以想像，係理想情況下呢三個層次應該係呈現一個金字塔式嘅結構，基礎能力係底，然後運動表現係中間，然後用呢兩層去支撐專項技術嘅展現。
所以簡單黎講，一個好嘅運動表現教練應該要做到用動作黎做到身體調整，達到（1）嘅功能，然後再根據（3）嘅目標，透過各種阻力訓練嘅方法，去提升（2），從而令到運動員更好地做到（3）。
—
我多次提到，運動表現係心、技、體嘅體現。技術固然重要，但如果過度專注技術，忽略身體質素嘅提升，有機會會導致身體肌肉嘅不平衡（唔排除有人單純練波都可以平衡，但大部分運動都係單邊運動，所以不平衡嘅可能性絕對偏高），最後形成一個倒金字塔式嘅情況（上文所講嘅1，2，3嘅倒轉），身體質素支持唔到技術嘅展現，或者支持唔到係高速移動情況下嘅穩定性。
最後輕則展現唔到技術，重則有受傷風險。
運動表現訓練並唔單純係增肌減脂，更重要嘅目標其實係提升身體嘅功能，令到身體可以支持到運動員展現自己嘅技術，從而提升運動表現。
Comments