有留意我ig story嘅朋友都知道，自從健身室再度關閉之後，我就宣布會係戶外舉行speed and agility 嘅團練，進行左兩個星期，有唔少朋友都有參與。直到健身室重開之前，呢個訓練都會繼續，所以有興趣嘅朋友可以pm 我報名。
—————— 我相信唔少朋友都會轉變為outdoor training，我都不妨分享一下簡單嘅plyometric training 嘅要點：
先做hip mobility drills
講左好耐，雖然大家都知道plyometric training係足底筋膜 & 阿基里斯腱嘅儲力同發力，即係好多人都會講嘅stretch shortening cycle (SSC)，但同時我地都唔可以唔記得plyometric training都包含三關節屈曲同伸展嘅元素。
三關節即係講緊髖關節、膝關節同埋腳腕關節，理想情況下每一下嘅落地都係三關節共同屈曲，衝擊力就可以由連結髖關節嘅大肌肉（大腿後肌/臀大肌）承受，而唔係單純由小腿肌肉同四頭肌承受。
為左令到肌肉可以正確發力，訓練前先做各種hip mobility drills，例如forward lunges，SLDL，glute bridge，adductor rocks等等，都係想喚醒髖關節附近嘅肌肉，令盤骨對齊，彈跳嘅時候可以容易徵召髖關節肌肉參與。
抬頭做動作
無論係做速度梯或者做跳欄動作嘅時候，好多初學者都習慣望住地下做，主要就係想望住要跳過嘅障礙物，防止撞到，同埋更容易預判位置調整發力幅度。但係大家都知道真實情況下係唔會低頭做彈跳，而且，經常低頭係會令到身體重心前移，繼而影響下肢發力。
理想嘅做法當然係抬頭望遠處，係空中感受身體移動嘅幅度同距離去調整身體重心。教練亦都不妨要求運動員抬頭望住一點去做動作，逼使身體隨住相對位置嘅改變而調整身體。
儘力做每一跳
為左避免受傷，唔同嘅plyometric training都唔會用超高嘅障礙物，一般都係運動員相對容易可以跳過。係呢個情況下，運動員嘅意圖，即係究竟係「輕鬆跳」定係「出盡力」跳，就會影響訓練效果。
如果你輕鬆跳，身體就自然唔會徵召咁多部位發力，訓練效果亦都打折扣。相反，如果習慣每一下都係出盡力跳，就可以有足夠嘅神經系統刺激，徵召全身嘅肌肉一齊參與。
相信唔少人都係係戶外進行緊訓練，希望以上簡單嘅三點提醒可以幫到大家。
—————— 聽工不停學，如果想了解更多更詳細嘅體能訓練/動態矯正知識，可以subscribe patreon，超過80篇文章同video可以參考。
Comments