相信對於教練黎講，內收肌群相對係大家比較唔理解嘅部位。
內收肌群可以分為：
恥骨肌 (pectineus) 內收短肌 (Adductor brevis) 內收長肌 (Adductor longus) 內收大肌 (Adductor magnus) 股薄肌 (Gracilis)
主要功能當然就係做內收，同時可以做髖關節內旋。從前到中間，恥骨肌到股薄肌就好似接力賽咁，慢慢幫股骨進行內旋。
-
內收，大家都可能會想像係股骨向中線收入去。但正如我早前係髖關節嘅文章有講過，下肢嘅比鎖鏈動作比較重要，所以大家都要從閉鎖鍊去思考問題。
咁內收嘅閉鎖鏈動作係咩？就係係（1）股骨穩定嘅情況下，（2）將盤骨慢慢移過去穩定腳，縮短中線同股骨嘅距離。
如果大家做唔到股骨穩定，或者係移動過程當中盤骨會旋轉，都即係代表你嘅內收肌應該有問題，不能夠發力。
係步行或者跑步時，內收係重心能否係兩隻腳中間來回轉移嘅重要因素，所以內收有問題，就會導致膝關節或核心都出現問題。
-
大家經常擔心嘅膝蓋內扣問題，其實都係源於髖關節不能夠有效內收。膝蓋內扣同埋髖內收，係視覺效果上係差唔多，都係膝蓋接近人體中線，不過一個係令髖關節肌肉承受力量，一個係令膝關節承受力量，邊個動作更好相信唔洗多講。
係訓練上我傾向唔會給予學員「膝頭唔好內收」嘅指令，因為「膝頭唔好內收」會自然演繹為膝蓋向外頂出去，而膝頭係無額狀面嘅移動能力，無論控制膝關節內收定外展都唔係好事。
比較好嘅做法係控制髖關節同盤骨嘅活動。當髖關節做到良好嘅內收，你就會感受到膝關節係額狀面嘅穩定，並唔會搖黎搖去，更唔會有膝內扣嘅問題。
所以較理想嘅做法應該係訓練兩邊髖關節嘅額狀面控制，即係內收嘅能力，呢個係比較好嘅預防膝蓋受傷嘅方法。
-
我係《肌動學與訓練應用》課堂上其實好多次要求學生設計訓練內收能力嘅動作，好多人都只會反射性地思考開放鏈嘅動作，即係夾腳，或者係側躺然後將下面嘅腳抬起等等。
當然呢啲訓練係activation上都有用處，但之後都要加入閉鎖鍊同承重嘅訓練，去加強整個下肢系統嘅穩定性。
最簡單嘅閉鎖鏈內收訓練動作，首推single leg deadlift，如果覺得比較難的話，可以選擇後腳只係踏後一步，唔係凌空嘅版本，具體可以睇番我早前拍嘅影片。
另外就係step up，lateral lunges 等等都係可以考慮嘅動作。
係實際操作上，要留意盤骨嘅位置，確保盤骨無上下扭動，亦都無左右扭動，只係髖關節進行內收動作，咁就係最理想嘅做法。
另外就係可以係向心、離心、等長收縮、骨盤旋轉、重量擺放位置方面做文章，不過呢個比較複雜，就唔係度詳談。
點解我咁著重內收嘅能力，係因為正確嘅內收能力可以令到臀大肌同臀中肌進行離心收縮。想佢地發力將個人推向前，首先就要令到佢地拉弓，進行離心收縮。
所以能否做好髖關節嘅內收係傷患預防同運動表現上都非常重要。
總括而言，就係係訓練上多留意自己有無做好內收嘅訓練。如果唔肯定的話，最起碼就係多做單腳訓練，並且離心階段長過向心階段，應該就可以練到內收功能。
Comments