每年都有好多人想入行做健身教練/體能教練，都係貪呢行門檻相對低，但人工又相對高。
但要成為一個有能力同專業嘅教練，其實又唔係咁容易，呢點放諸四海皆準。如果細心思考教練要做嘅事情，就會發現教練工作包含嘅範圍非常多。
教練教學時需要嘅知識包括： 解剖學 動作分析 動作檢測 排課表嘅能力 營養知識 動作教學
-
再細緻舉例，即係：
點樣練到特定能力，例如爆發力/力量/關節活動度/心肺功能，點樣係動作同課表上微調？（動作選擇，intention，課表volume？）
如果訓練時膝關節不適，動作上要點樣調整？（動作執行問題定係本身肌肉問題？）
訓練後大腿後肌唔舒服，點樣放鬆/舒緩？（volume太高？太重？手法放鬆？）
跑完步脛骨前面痛，但痛一陣又無事，點先可以唔再痛？（幫佢調整跑姿？）
我想跳高啲，係咪一定要做olympic weightlifting？（olympic weightlifting, plyometric training, force-velocity curve）
我想增肌/減脂，飲食上點樣調整呀？（增加proteins? 飲食選擇？）
下刪n 項問題，但以上嘅每一個細項已經足夠細緻鑽研。
另外，仲有一啲實際操作上嘅技能，例如：
同學生溝通，了解實際需要嘅能力
比提示語(cue)嘅能力
觀察學生動作是否精準嘅能力(coaching eyes)
同學生建立關係，令到佢願意繼續訓練嘅能力
令學生理解動作要素嘅能力
再然後，仲有一啲比較專門嘅知識，例如：
衝跑
呼吸訓練
olympic weightlighting
Flow movement
-
教練人數增加，競爭增加，就自然要提升自己嘅競爭力。
唔洗全部技能都識，但起碼，要有一兩項精通，能力高於平均值嘅技能。另外就係其他都有所涉獵，唔洗好精通，但起碼有一定嘅理解，講得到基本原理，係學員問相關問題嘅時候可以做出簡單回答。
然後當學員想進一步了解，就refer佢比適合嘅專業人士。
另外，從不同角度了解人體，可能會改變你對人體嘅睇法，進一步加強你本身精通嘅技能。
如果有follow開知名外國教練（歐美/台灣）嘅朋友，都會透過佢哋嘅文章/影片了解到佢哋有好豐富嘅知識儲備，並且涉獵面好廣。
如果有心想係呢行長遠發展嘅朋友，真係要不停進修，先無咁容易被淘汰。
知識量未必係可以幫到你搵新客，但起碼可以增加你嘅可信度，會更容易留到已有嘅學員。
Comments