畢業季節，大家都開始搵工，亦都相信有人想做教練，無論係做健身教練、體能教練或者運動轉項教練。
會選擇呢條路嘅人，大部分都係運動愛好者，甚至乎係學界/業餘運動界獲獎無數，然後好想用另一個方法繼續釋放自己對運動嘅熱情。
可能有人會覺得，運動做得好，做教練就自然會好，係好正常嘅事。
但做教練，同做運動員，係截然不同嘅兩回事。
做運動員，可以淨係思考自己，可以淨係享受運動嘅樂趣。
但係做教練，就唔係關乎自己嘅事，而係點樣幫助運動員成長嘅事，背負住運動員對你嘅信任，佢地相信跟隨教練嘅安排就可以進步。
可以想像係另一種壓力。
——
需要嘅Skillset亦都大有分別。
做運動員嘅時候淨係需要思考運動嘅技術，但教練除左需要思考運動嘅技術，仲需要思考點樣令到運動員掌握嗰樣技術。
運動能力好唔代表教學能力好，自己做到同點樣令到人地做到係非常唔同嘅兩回事。
有教學經驗嘅人就知道，當要將自己識嘅野由原理開始完整講解，係幾咁困難嘅一件事。
好嘅運動員好大可能唔係好嘅教練，因為佢地無經歷過普通運動員嘅掙扎，都唔知點解其他人做唔到。
相反，普通嘅運動員成為教練可能更好，因為佢地嘅能力係無數次掙扎同trial and error得返黎。
當然，唔係叫好嘅運動員唔好做教練，只係想提醒「換位思考」嘅重要性。
有時有啲野唔係死操就操到返黎，運動員時覺得死操就有嘅技術同狀態，其實背後可能都有教練嘅安排係入面，或者你真係基礎打得好好所以先順理成章地提升到，但係你身上work唔一定代表係其他人身上work，呢個係做運動員時經常會有嘅盲點。
然後當自己學生做唔到就係人地唔夠勤力，操得唔夠多，但現實很肯定比呢樣更複雜。
——
做運動員時嘅skillset要提升，需要學同練；同樣地，做教練嘅skillset需要提升，都係需要學同練。
如果淨係將自己比人教時嘅方法套用到自己學生到，at the very best situation，都只係可以培養到個學生好似自己咁好，更何況好多時候都唔得。
要青出於藍，培養出更高水平嘅運動員，就需要自己嘅教學能力都持續提升。
相信大家都理解，香港嘅運動水平，係遠遠落後世界。好多時候自己小時候用緊嘅訓練方法，都係落後其他地方。如果仲用同樣嘅方法應用係下一代身上，都只係將成個情況延續一代一代咁延續落去。
要提升教學能力，就要向高水平嘅教練學習教學能力。
外國好多非常高水平嘅教練，唔係要照單全搬佢地嘅教學方式，但起碼佢地嘅思考過程（thought process），安排訓練背後嘅邏輯都好值得我地學習。
好多時候，大家要達到某個水平，先會明白高水平嘅教練其實係有幾高。而我可以肯定嘅係，世界上依然有好多高水平嘅教練好值得我去學習。
香港比較興起治療相關嘅課程，但其實外國同樣有好多訓練相關嘅課程/系統，非常值得學習，而且係我依家嘅眼光睇，依然係非常完整。
如果大家有心想係呢行發展，成為高水平嘅健身教練/體能教練的話，不妨將眼光放係全世界，向其他地方嘅人學習。
當你真心認清自己不足，再虛心向其他地方嘅人學習，就會發現到處都係可以學習嘅知識同技術，然後就係成為高水平教練嘅起點。
Comments