最近先知道原來instagram 係有字數限制，所以都唔會寫太多，都係隨心寫，諗到就寫，視乎我最近遇到咩情況，睇過咩書或文章。
想睇詳盡一啲嘅，歡迎移玉步去patreon。
雖然宜家健身室停業，但都希望我嘅文字可以激發到大家思考。趁呢個時候思考一啲平時無思考嘅問題，提升自己。
p.s. 即時無gym開，但有無野寫，其實都係視乎自己睇幾多野思考幾多野，建議大家有時間都可以睇多啲野。
---------------------------------------------------------------------------------------------------------------------------
上一篇文章講左髖關節活動度嘅基本概念，講到髖關節既要穩定，又要活動度，而穩定性嘅訓練比起一味追求大幅度活動能力更加重要。
咁點解有啲人嘅髖關節可以開到好大？
首先，先天嘅盤骨股骨角度絕對有影響，呢個係受本身結構影響，所以有啲人會容易打開。
另一種，就係本身係屬於hypermobile嘅人，即係關節活動度比常人大嘅人，呢種人都係容易打開關節活動度，但控制能力就可能會有問題。呢個問題可以另文再寫。
撇除呢啲先天因素，講番啲一般常見嘅情況先。
上文講過，髖關節即係股骨塞入去盤骨底部嘅兩個凹位之後形成嘅關節。髖關節活動即係股骨係個凹位入面嘅動作。而如果本身盤骨太歪，就有機會令到髖關節唔對位。盤骨歪與否，除左睇髖關節肌肉張力，仲受盤骨以上嘅肌肉影響，即係深層核心肌肉。
其實即係睇呼吸，睇兩邊有無良好嘅肋骨動態，能唔能夠做到良好嘅擴張收縮同旋轉，有無肋骨外翻。
由於內臟數量問題，兩邊肋骨動態不會完全相同，但能夠做到相對正常，能夠做到擴張收縮，胸同腹擴張比例接近1：1已經非常好。
穩定嘅核心唔一定會帶來誇張嘅盤骨活動度，要係肌肉拉長嘅情況下做到發力係依然需要訓練。但排列良好嘅核心可以令到負責盤骨活動嘅肌肉處於適中嘅長度，適合進行拉長/縮短。
所以穩定嘅核心就係盤骨動態嘅起始點。
---------------------------------------------------------------------------------------------------------------------------
另外，下肢嘅活動度並唔係單純係髖關節，而係髖關節同盤骨嘅共同活動。例如跑步時嘅triple extension動作，其實係髖伸加盤骨前傾先會做到。同樣地，抬腿其實就係髖屈加盤骨後傾。所以跑步時有良好嘅hip extension，就更容易維持身體直立。做得唔好，就會邊左身體前傾，好似向前跌嘅跑步方式。
身體側抬腿都係一樣，都係靠身體側彎，盤骨側抬再加上髖關節活動先可以做到高踢。而要做得好呢個動作，都係嗰句，重心腳要踩穩。
即使係大家經常見到嘅9090動作（不是supine 9090，而係前腳維持90度，後腳維持90度，上身坐直嘅動作），其實都係需要髖關節同盤骨嘅共同活動先可以擺好嗰個姿勢。而如果本身髖關節控制能力不足嘅人，要勉強進入嗰個姿勢，都係需要加大盤骨嘅活動度，扭動脊椎。所以如果本身嘅關節活動度不足，唔能夠進入9090嘅姿勢，就唔好勉強，可以選用其他動作或者運用器具嘅幫助。
教學者亦都要留意呢點，做到動作唔係重點，用甚麼代價做到動作先係重點。
所以，要做到大家心目中好誇張嘅髖關節活動度，髖關節活動之餘，都要兼顧埋盤骨嘅動態。而盤骨嘅動態，除左睇下肢肌肉嘅張力，都要睇盤骨以上，即係深層核心嘅穩定性。
---------------------------------------------------------------------------------------------------------------------------
另一個可能性，就係佢嘅筋腱同韌帶拉得比較鬆，同肌肉對拉扯嘅耐久度上升。有啲人會覺得拉到一字馬好重要，好睇之餘對於傷患預防都有幫助。
咁事實上拉得鬆有無問題？
拉鬆筋腱韌帶，除左穩定性可能會受影響外，剛性減低，對於做快速嘅彈跳爆發力動作都會受影響。運動時嘅發力除左係依靠肌肉發力嘅向心離心收縮外，更多係依靠儲力反彈嘅方式發力，而呢點係依靠肌肉嘅等長收縮，然後比筋腱儲力再發力。
而肌肉瞬間等長收縮嘅能力都同肌肉對拉扯嘅耐久度相關，所以如果肌肉太習慣慢速嘅拉長，對於運動員嘅發力能力黎講都唔係好事。
大家可以想像瑜伽式嘅慢速拉長同短跑運動員嘅快速拉長，就會想像到兩種嘅分別。
我係patreon寫左一篇文章同拍左一段video去講呢個concept，有興趣嘅可以上patreon 睇文章。
所以，綜合兩篇文章，想你嘅髖關節活動健康啲，除左做更多嘅髖關節drills 之外，仲記得要留意埋盤骨穩定性，同埋做多啲mid-range 發力嘅training。仲有，如果你係想爆發力同場上表現好啲的話，除左做mobility drills 之外，更重要其實係做多啲近似場上動作嘅drills去訓練相應嘅能力。
Comments