盤骨前傾/肋骨外翻等等形容姿勢嘅詞語，相信大家都成日聽，而且網上都有好多方法針對性去改善呢啲姿勢。
但其實有無完美嘅姿勢呢？
首先我地要知道，人體係一個持續活動嘅個體。身體嘅眾多關節、眾多肌肉，都係設計黎比身體多角度移動。盤骨前傾後傾、肋骨擴張收縮、肩胛骨前引後縮等等，都係身體係不停活動時嘅過程。
踏步向前時前腳會盤骨後傾，後腳會盤骨前傾；旋轉時一邊肋骨會收縮，一邊肋骨會擴張；步行時一邊肩胛骨會向前引，另一邊肩胛骨會後縮。
當然，負重阻力訓練時係有更好地承受重量嘅姿勢，例如挺胸收肩胛的確係更容易用到背闊肌黎support推胸時嘅重量。但係人體唔會永遠係維持推胸姿勢，例如肩胛骨需要係伸手向前攞野嘅時候前引，亦都唔會永遠都挺胸姿勢。
只要你係不停移動緊，身體就會不停改變姿勢，並唔會話你需要不停地「挺胸收腹沉肩」先係完美嘅姿勢。相反，假如你不停地想發力、谷實去係運動期間維持呢啲姿勢，你只係減少緊運動時可供身體使用嘅身體部位，更加會令到動作質素降低。
姿勢係反映緊你使用身體嘅習慣，你傾向用邊啲肌肉就會慢慢改變關節嘅位置，從而影響身體嘅姿勢。所謂完美的姿勢，或者我理解為相對平衡嘅姿勢，其實係代表你日常能夠運用身體大部分嘅肌肉，令到身體平衡地發展。
所以如果你想改善姿勢（aka. 改善盤骨前傾/肋骨外翻/圓肩等等），與其提醒自己要係日常生活hold 實某個「完美姿勢」，提自己唔好做「錯誤嘅姿勢」，更理想嘅辦法係係動作訓練著手。透過唔同嘅動作學習/改善發力模式，令到自己係日常生活/運動時用到平時少用嘅肌肉，先係更好地令身體肌肉均衡發展嘅方法。
簡單啲講，就係不停地，多角度地發力移動，多用平時少用嘅肌肉，肌肉張力平衡，係更有效去維持一個相對良好嘅姿勢。
—————— 想睇多啲深入嘅文章，歡迎subscribe patreon，有超過80篇高質素文章，涵蓋多個範疇，絕對物超所值！
Commentaires