如果詢問大家點解想成為一個教練，一般會聽到咩答案？
首先會話：因為我自己好鍾意運動。
然後會話：所以我想教人做運動，帶大家體驗運動。
心底裡嘅原因，可能係因為： 入行成為教練門檻非常低，但時間相對自由，而且收入唔錯
我相信以上全部都係真實睇法，為收入入行絕無問題，亦無意貶低任何人，但實際上要成為專業教練唔係單純「鍾意運動」就可以做到。
我相信每一個成為教練嘅都鍾意做運動，所以第一個原因講左等於無講。
第二個原因則係我每次都聽到搖曬頭，因為呢個講法將「帶朋友一起運動」同「教學員做運動」兩者混為一談。
「帶朋友一起運動」可以係大家一齊操，一齊出身汗，呢個絕對無問題。
我相信「帶朋友一起運動」，你未必會收錢，但「教學員做運動」，就肯定會收錢，始終專業有價。
當牽涉到錢，就牽涉到價值。
我相信學員比錢搵教練，表面上係想搵人教運動，但事實上亦都係想搵教練幫佢地解決自己透過苦練唔能夠解決嘅問題。
呢個時候就需要問自己，究竟自己可以為學員帶來咩價值，解決咩問題呢？
增肌減脂？動態調整？運動表現提升？提升關節活動度？預防受傷？
要將「教人做運動」視為一份專業，就要做好「專業技能嘅培養」。
無錯，要進入呢行成為「專業」教練門檻係低，考一張cert就可以，但要留得低係呢行成為真正專業嘅教練一啲都唔容易。
我認識嘅好多專業教練都有不停地進修學習，提升自己嘅專業技能，就係為左提升自己嘅價值。
專業同普通嘅教練嘅不同之處就係能否透過自己嘅經驗同知識，安排不同嘅訓練為客人解決問題，呢個先係教練嘅價值所在。
除左讀書之外，不停思考點樣實際應用，解決客人實際面對嘅問題，係比實際睇video上堂考試要困難好多。
另
一樣需要記得嘅，係教練需要為自己安排嘅訓練負責任。我相信無教練存心傷害自己嘅學員，但同時亦都不能否認每個訓練動作都有危險性。自己做得唔好，自己整親，係小問題（可能都唔小）。但學員信任你，做你安排嘅動作時受傷，就係大問題。
所以，係「自己鍾意做運動所以想教人做運動」、「時間相對自由」、「收入唔錯」背後，其實係需要不斷嘅學習同解決一個又一個嘅難關先可以達到。
當然，仲有我早前係文章《 關於教學能力的思考》所講嘅教學能力，都係重要而且需要學習先會得到嘅技能。
要講呢啲野，唔係想勸阻大家唔好做教練，而係想講要成為一位好嘅教練，遠遠比「我好鍾意運動，所以想教人做運動」要來得困難。再退一萬步講，如果呢樣野係簡單嘅，又點會輪得到你？
相對嘅，如果大家準備好努力培養自己嘅專業技能的話，歡迎大家入行成為一位好嘅教練。
Comments