訓練可以有好多不同嘅面向，視乎你嘅目標而定。如果你係健美運動員，會想要盡可能得到肌肥大。如果你係運動員，可能會想跑得更快跳得更高。如果你係運動愛好者，可能會想身體活動得更靈活。
但係無論你嘅訓練目標係咩，都唔可以忽略一樣嘢，就係要維持肌肉張力嘅平衡，以 #維持關節內嘅空間。
一般黎講，一個關節周圍有好多肌肉連結，而肌肉嘅張力平衡與否會影響關節嘅位置。如果有啲肌肉張力過高（大力啲，傾向用力先），就會容易將關節帶離開原本嘅位置。
骨頭同骨頭中間本身有一定嘅空位，呢啲空位係設定比動脈、靜脈、神經、淋巴等等管道通過。（上圖，紅色係動脈、藍色係靜脈、黃色係神經、綠色係淋巴）
如果空間減少，通道變窄，就有機會壓逼呢啲管道，造成血液循環不足、淋巴循環不足、或者肌肉不能夠正常發力。
係上肢黎講，比較重要嘅位置有頸、鎖骨同第一節肋骨中間嘅空位，仲有就係肩胛骨外緣同肱骨中間嘅空位，都係比較多管道通過嘅部位。
下肢黎講，基本上就係整個髖關節前方嘅部位。
大家如果打開anatomy apps，將動脈、靜脈、神經同淋巴管道顯示出黎，就會明白以上嘅講法。
——
咁咩情況下會壓逼到上面所講嘅部位？用通俗啲嘅講法，就係上交叉綜合症同下交叉綜合症。
上身經常寒背、圓肩，都會令到鎖骨附近嘅空間減少。
同時，如果肩胛骨唔識後縮，但肩肱關節屈曲（向下向後移動）嘅動作就會變左壓縮肩胛骨外緣同肱骨嘅空間。
下肢部分，長期盤骨前傾地發力嘅人，就更容易有夾擠嘅情況出現。
咁點樣避免？簡單黎講，就係練身體後方嘅後側鏈肌肉。
練肩胛骨後縮嘅肌肉，即係菱形肌、中下斜方肌，幫肩胛骨活動，同時可以拉長胸椎前方嘅肌肉。
練盤骨後方嘅肌肉，即係膕繩肌，令到佢能夠係矢狀面穩定盤骨的話，打開盤骨前方嘅空間。
更簡單地講，即係要全面咁訓練。
即使無訓練習慣嘅普通人，平時做多啲胸口同髖前側嘅伸展，都大有幫助。
訓練，除左肌肥大、跑得更快跳得更高之外，仲可以成為一個調整肌肉張力，維持關節穩定性嘅一個工具。
大嘅胸大肌同二頭肌固然好睇，但如果因而壓迫血管同神經，就得不償失。
係提供訓練課表嘅時候，亦都可以思考一下自己有無平均鍛鍊各個關節嘅不同角度，令到身體肌肉可以平衡發展。
Comments